Subay Makamaya' ha Mantiyanak

Hambuuk dum, dimungug isturi hi Hapsa kan Apu’-ina’ niya. Nagpa-isturi siya pasal in mastal nilla nagbanda’ kanila sin pagpanayamnayam ha klas nila ha pits 27 sin August, 1999. Magplingkatan isturi in pagkuntisan. Dayng ha Apu’-ina’ niya, ini in manga kiyahatihan niya tungud mantiyanak. In mantiyanak hambuuk kaginis sin ambak. In ambak ini di’ magkatingug biya’ sin manga ambak naghuhula’ halawm sapa’ atawa manga palaka’ naghuhula’ ha guwa’ sin sapa’ iban lanaw.

In mantiyanak makamula ha tau. Magpangutkut siya. In tau makutkut sin mantiyanak agad mapunung sin bias. Awn laway sin matiyanak. In laway niya lassun. Bang siya makakutkut, magad in laway niya. Mapatay in pagkahi niya ambak bang niya makutkut pasal sin kusug sin lassu sin laway niya.

“Sing masa namu’ pa nag-iiskul, klasmit namu’, Grade 4, napunung hangkarum iban hangkaadlaw hat sadja nakutkut sin mantiyanak. Daypara, in kami nakauna tagamastal milikan maingat mag-ubat. Makaulung tuud in klasmit namu’ yadtu. In ngan niya hi Sabturiya. Di’ siya magkayba’kayba’ halawm klas. Di’ agad magbissara bang bukun da tawagun hi Mam magbassa” in ganap isturi sin apu’ hi Hapsa.

Hambuuk adlaw, namaygu’ pa sapa’ hi Hapsa. Sa’bu siya naglalanguy halawm sapa’, nakita’ siya ambak ha babaw batu.

“Nyi’, nyi’, nyi’! Mantiyanak, amu isturi hi Apu’-ina’!” tulik agak-agak hi Hapsa.

“Bukun aku Mantiyank” sambag sin ambak. “Iban ayaw kaw, Hapsa mabuga’ ha Mantiyanak. Mantiyanak in mabuga’ kaymu” banda’ sin ambak ha babaw batu.

“Mayta’ mabuga’ kaku’ Mantiyanak?” imasubu hi Hapsa.

“Pasal malata kaw. Misan bukun tau, dahun mu ra magbissara halawm atay. Nangasubu hadja kaw sin kaginisan ha mastal mu, ina’ mu, ama’ mu, taymanghud mu iban kaibanan ha manga tau rugaing. Mabuga’ in Mantiyanak magpakita’ kaymu ha supaya di’ mu siya maasubu. In matiyanak taga-anak hataykud niya. Bang makarungug pangasubu, anak in sumambung. Pagsambung sin anak mahinang siya ambak biya’ kaku’. In anak ha taykud sin matiyanak, anak sin ambak tiyakaw sin mantiyanak bat siya di’ paghapdiuun biya’ anak ambak” tiyakitaki sin ambak kan Hapsa.

“Hawnu tungud in mantiyanak naghuhula?” imaasubu hi Hapsa.

“Naghuhula’ siya halawm lanaw, ha jamban, iban ha manga dunuk atawa lakab. Masub siya magguwa bang waktu pangulan” isturi sin ambak sarta’ limaksu na siya palawm li’bug ha sa’bu nagdurumul pa lawm tubig hi Hapsa.

“Uy, hawnu na kaw ambak?” lingi’ niya madtu mari sa’ way niya na kita’. “Magsukul, ambak ha bayta’ mu kaku’ “ agi hi Hapsa sarta’ minuwi’ na siya pa bay.